Co l’Aisciuda ladina 2017, la scomenzadiva del Comun General de Fascia per ge dèr luster e gaissa al lengaz ladin, l é stat portà dant n argoment zis gustegol: l teater desche laboratorie de lengaz e identità.
N moment de festa, ma ence de reflescion sul valor del lengaz e de la identità de mendranza, con chela de portèr dant tras l’èrt teatrèla l esser ladins. Spilenèr vel dir comunicazion de la emozions e confront, l é ence n jech didatich per emparèr lengac desvalives, e ti gropes de teater de Fascia l é apontin ence chest: atores no ladins che se dèsc ju con chest lengaz per l emparèr e per se fèr ite te la comunanza.
Endèna chesta scomenzadiva la jent de Fascia à podù se endeletèr con duta la formes de èrt teatrèla: la jocoleria, la comedies, la mascherèdes, l teater sperimentèl, i videos.
L é stat i joegn del “Circensema” con sie jeghes acrobatics, i gropes de teater desche La Mizacoles de Ciampedel co “Na Cèsa de strambes” de Simon de Giulio, I Amisc del Teater da Moena con “Voleve ben dir!” de Enrica Jellici Mantino, i Bontemponi da Poza con “Domane la cèsa itea” de Loredana Cont, L Grop de la Mèscres de Dèlba e Penia co “Na sera de Caranascèr” de Simon de Giulio e l grop de teater VIF de la Scola Ladina de Fascia con “Grandhotel Valfassa”. L é stat portà dant ence l teater sperimentèl col endrez de Alessandro Arici e na sperimentazion video, che à desche protagonisć i colaboradores del Laboratorie Ensema de Ciampedel.
L é stat ence endrezà n moment de reflescion sul teater ladin desche met per ge palesèr la ladinità ence a chi che vegn da foradecà, n aprofondiment col ator badiot Simon Kostner per atores de teater de Fascia e ence per chi che aea gust.
L resultat de chesta setemèna de legreza e consaputa dintonvia l’èrt teatrèla de l’Aisciuda Ladina, l é stat dalbon percacent tanche l é stat dezidù de meter a jir ogne doi egn la Rassegna de Teater de Fascia.
N moment da emozion e de gran valuta l é stat chel portà dant da la giornalista Monica Cigolla co la storia del teater fascian, enjonton chiò l test de sia enrescida
Rassegna de teater 2024-2025
La terza Rassegna de Teater de Fascia porta dant na bela neva: la tolarà ite dut l’invern e duc i comedianc de Fascia, coscita da ge sporjer a la jent de Fascia n temp feruscol, curious e pien de spas.
La rassegna la ge é stata dedichèda a Vigilio Iori rechia, om che à fat n muie per l teater ladin.
Rassegna de Teater 2022
Spilenèr vel dir comunicazion de la emozions e confront, l é na vida gustegola e originèla per dir fora sentimenc, per ensegnèr, per endeletèr i etres ma ence per cognoscer e emparèr neves lengac, neva paroles e l teater doventa n lech olache ogne un de nos pel doventèr pèrt de la stories che vegn portà dant sun paladina e lech olà spartir na esperienza magica!
Rassegna de Teater 2018
De november del 2018 l é pontà via la pruma edizion de la Rassegna de Teater endrezèda dal Comun general de Fascia.
La rassegna, metuda a jir ogne doi egn, l é l bel resultat arjont de gra a l’Aisciuda ladina 2017, apontin dedichèda a la bela èrt del teater che vegn portà inant con gaissa e gust da pèrt di gropes de teater de duta Fascia.
