Se vel tegnir su e portèr dant l lengaz ladin, no demò col jir a chierir tel passà de noscia cultura, ma col uzèr fora l ladin tras la doura di mesi più neves che l é a la leta: televijion e social.
Defat i servijes endreza e coordenea, ence tras colaborazions, la produzion de desferent material video: documentères, clip de promozion, “Vic e Ac” col teater ladin, e “Pedies” rotocalch ladin de informazion.
L obietif che se se met dant de arjonjer tras l program “Pedies” – projet endrezà dal personal di Servijes linguistics e culturèi col didament giornalistich de la Giornalista responsabola Monica Cigolla – l é chel de portèr dant neves e curiositèdes da Fascia, e da la autra valèdes ladines, a na vida gustegola, feruscola e sćiantiva, col uzèr fora l lengaz ladin tras l’atualità.
Tv ladina vel esser n laboratorie, co la jent che no vèrda demò, ma che la é pèrt ativa de la creazion di programes: ence vo podede doventèr protagonisć!
N laboratorie semper atif olache se tol dant con gaissa duc i neves projec e i besegnes, olache se laora ensema per tor su neva idees, les baratèr e les meter en esser.
Vardane su…
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora sun Trentino Tv – canal 10 te provinzia de Trent – vigni sabeda da les 18.00 (sie da sera), domenia da les 13.30 (mesa la does domesdì) e lunesc da les 11.30 (mesa les doudesc) – e sun AltoAdige TV – canal 11 te provinzia de Busan – vigni domenia da les 18.00 (sie da sera).
