Teater Ladin

L teater l é n’èrt che ne deida a veder l mond da n pont de veduda desferent de chel che aon, l é n biteboi de situazions e emozions, che pel fèr grignèr ma ence che deida a fèr pissèr, l é n strument dassen emportant che pel orir la ment, sensibilisèr la jent e soraldut l fèsc bon a duc e l doventa ence n strument de gran valuta per passèr n lengaz. L teater l é semper stat n meso percacent per didèr la cultura, la storia e la identità e mascimamenter per i lengac de mendranza, l doventa n strument potent per sia valorisazion e conservazion.

Tras l teater la storia e la tradizions de chesta comunanzes les pel vegnir portèdes dant a n publich più gran, se pel engaissèr e descedèr fora la doura de n lengaz manco sparpagnà. La pruma endesfida per l teater l é chela belimpont de mantegnir l fèr sćiantif e la richeza de la esprescions tradizionèles e les mescedèr co la dinamiches del fèr de anchecondì e donca tor ite paroles neves. A chesta vida l lengaz de mendranza, estra che soraviver, l se svilupea e l doventa flessibol e l se adatea ai besegnes de comunicazion d’aldidanché. Mescedèr l veie col nef dèsc l met de viventèr e smaorèr l lessich de n lengaz de mendranza che a chesta vida l doventa emportant e de fazion per la generazions neves che pel se emprevaler de na esprescion culturèla che tegn en conscidrazion l passà e la se aur al davegnir… donca che él miec che na rassegna de teater duta per lengaz de mendranza?