L Carnascèr l é n temp del an rich de color, ac e musega che ge sà bel tant ai gregn che ai picioi. I Servijes linguistics e culturèi del Comun General de Fascia à volù ge sporjer n don creatif a duc i bec e la bezes de Fascia per poder se endrezèr enstesc l guant da jir a mèscra.
L projet, vegnù fora da na colaborazion col artist Ismaele Soraperra, l à lurà fora a na vida scempia la faceres e la capes de la Gran Mèscres – Laché, Bufon e Marascons – e na facera da burt, per poder meter a la leta di bec e de la bezes, tant a scola che te la families, n laboratorie creatif.
Te chesta piata internet l é a la leta i file pdf da desćiarièr, da taèr fora e meter ensema: serf demò na forfesc, na cola e, con mingol de fantasia, vigniun pel personalisèr sia mèscra.
Mèscres
L Laché
L Laché, l ambasciador de la mèscres, chel che aur l Carnascèr. Tel file l é la facera, la capa, la mesacoudes de gial sforcel e la cordeles da color.
La Facera da burt
La Facera da burt l à na longia lenga checena che somea che la te tole per man! La facera da burt fat e sfodegà… l é la più bela! Recordave che la mèscres a burt les é grovies e regolèdes cochemai, semper tatarèdes su.
L Bufon
L Bufon l à la facera col nès lonch con forinsom n pirol ros, la capa longia e spiza con forinsom cordeles e n ciufol de piumes de gial sforcel e l tegn te la man dreta la stica che ge serf per no se arvejinèr massa a la jent, per tocèr e aer l’atenzion de la persona che l vel enjurièr; te la man cencia enveze l tegn l cucaloch, che l doura per troèr fora l pere cos a chel che l ge dijarà su sia rimes pizochentes. Per ve didèr a meter ensema la stica e l cucaloch l é ence l file co la istruzions.
I Marascons
I Marascons i à la facera, na capa desche chela del Laché – fornida su con fiores, spieie e la mesacoudes – ma zenza cordeles. Che che desferenzia i Marascons, che i va semper en cobia, l é ben segur la centes da bronsins, che i sona a temp vigni outa che i fèsc n pas… o miec n saut.
