L teater tradizionèl te na val turistica da mont, olache stèsc na mendranza linguistica, pel doventèr n strument potent per stravardèr e portèr inant la doura del lengaz e la tradizions dal post. Te n contest turistich, l teater pel engaissèr e arvejinèr la persones a stories, lejendes, usanzes e valores culturèi che senò podessa vegnir desmentié. La raprejentazion teatrala doventa, per la jent dal post e per duc chi che à dezidù de vegnir a stèr te chesta val, n strument per viventèr l lengaz ma ence per sensibilisèr dintornvia sia valuta e meter al luster l’emportanza de la desvalivanza linguistica.
La rassegna de teater ladin 2024/2025 la ge é stata dedichèda a Vigilio Iori rechia, om che à fat n muie per l teater ladin.
La pruma scontrèda te chela che l é stat portà dant l projet de la Rassegna 2024/2025, la é stata endrezèda de jené del 2024, col Assessor de Procura Amedeo Valentini, la responsabola del ofize di servijes linguistics e culturèi Evelyn Bortolotti, i “Amisc del Teater” de Moena, “I Bontemponi” de Sèn Jan, la “Sociazion Antermoia” de Mazin, “La Mizacoles” de Ciampedel e l “Grop de la Mèscres de Dèlba e Penia”. L é stat na sera olache i gropes se à metù a la leta con gaissa, gust e na gran voa de colaborazion, per enjignèr n uton/invern gustegol, feruscol e de spas.
Na bela neva te la Rassegna 2024/2025: l temp de teater l é stat più lonch ajache l é peà via ai 30 de november del 2024 e l se à serà su ai 4 de mèrz del 2025 e l à tout ite duta la formes de teater che l é te val: comedies, laboratories e mascherèdes.
Sie i gropes che à tout pèrt e che se à baratà la paladina: La Mizacoles da Ciampedel con “N Lomescel da desgatièr” de Antonia Dal Piaz; I Bontemponi da Poza con “Zacan zeche da zacar”, toch de comedia scrita dal grop medemo; La Sociazion Antermoia de Mazin con “La Eles de Dioniso” resultat de n laboratorie de teater per jent grana; I Amisc del Teater de Moena con “Locdàun” de Ilaria Chiocchetti, i Trei Carc de Ora con “Do l vièl del saer: Catina Pezzé Batesta e Bepi Felicetti Zompin” de Ilaria Chiocchetti e l Grop de la Mèscres de Dèlba e Penia con “Te tieja del ors” de Stefen Dellantonio Monech e “Gotèrt e Nazio nun à rejon” de Simon de Giulio.
I teatres de Fascia, i se à empienì de n publich enteressà e feruscol che no vedea l ora de se goder con nosc comedianc!
