Enscin ades se à podù meter a jir chest event demò per na edizion, chela del 2018, ajache tel 2020, canche fossa stat la seconda edizion de la rassegna de teater, l é crepà fora l COVID che à obligà duc a se fermèr. Ma chest de segur no à destudà ju la voa e l gust de nesc atores, che cò i à podù e ge é stat domanà de tor pèrt a la rassegna de teater 2022 i se à metù sobito a la leta con sbunf e gaissa per ge dèr amò luster ai teatres de Fascia. E belapontin ai 18 de november l é peà via la la Rassegna de teater 2022 che é jita inant enscin ai 18 de dezember e a chela che à tout pèrt i Bontemponi da Poza co la comedia da grignèr “I regai più bie no se i fèsc ite” de Loredana Cont, la Mizacoles da Ciampedel co la comedia da grignèr “La tradida dessenèda” de Davide Arminio, i Amisc del teater da Moena co na comedia scrita da Ilaria Chiocchetti “Jiar col Föch” e la sociazion Antermoia de Mazzin col spetacol “Centecincanta la gialina cianta” vegnù fora da n laboratorie de teater per jent grana enjignà su tesć de Achille Campanile e pissà da Michela Marangoni.
Spilenèr vel dir comunicazion de la emozions e confront, l é na vida gustegola e originèla per dir fora sentimenc, per ensegnèr, per endeletèr i etres ma ence per cognoscer e emparèr neves lengac, neva paroles e l teater doventa n lech olache ogne un de nos pel doventèr pèrt de la stories che vegn portà dant sun paladina e lech olà spartir na esperienza magica!
Na edizion chesta che à chiamà ite sacotanta jent, che à empienì, descheche no l’era amò sozedù, i teatres de duta Fascia…
