Anchecondì la tecnologia sporc sacotenc strumenc “high-tech” tras chi che l bulo pel meter en esser a do a do l’azion de persecuzion ti confronc de sia vitimes. Te chest cajo l bulism doventa “cyberbulism”. A la basa de la azions de cyberbulism l é na neva “tecnica”: la trasmiscion eletronica de la manaces.
I cyberbuli l é persones che la vitima pel cognoscer te scola, ti gropes de sport, ti gropes de amisc, ma ence su internet, tras i social o ti jeghes online… i pel se sconer dedò profii fausc o zenza inom.
I tousc e la touses i vif duc i dis a do a do te n spazie che l scon tenetes e pericoi: l web.
Jir te la rei con consaputa, l fèr con anteveder e sens zivich zenza se lascèr tor ite da n fèr falà, pel ferèr dans e problemes soraldut per i joegn, che te chest contest l é la persones più scherpentes de noscia sozietà e a risech del cyberbulism.
L cyberbulism l é faich e pericolous ajache l pel tor ite chichessie, zenza limic de età, omegn e femenes, olachemai tel mond, tant desche vitima che desche persecutor.
No ge vel mai desmentièr che ence canche sion sconec vindedò l vidrel de nosc fonin, noscia azions e noscia paroles é reèles e les pel fèr mèl.
Messajes online violenc e enjuriousc, scric per trinzenèr, fèr del mèl, dir ju di etres per ge fèr dan, con cativeria e zenza retegn. Dut chest l é violenza, e l à de gran conseguenzes: la persona se tegn de mèl, la se isolea da duc, la pel padir deprescions, aer momenc de panich e ruèr enscinamai a se tor la vita…
Genitores, ensegnanc, amisc, dotores di bec, i pel ferèr chesta violenza, dèr didament e blochèr chesta azions che les é pericolouses e les fèsc mèl tant a livel fisich che psicologich.
Te chisc caji cognon se oujer a la istituzions che se cruzia de chest problem e a la polizia de la posta.
