Te la lingia de codejie “Entener e se fèr entener” dei Servijes linguistics e culturèi del Comun General de Fascia l é ence “N codejel per rencurèr n ort a na vida ecocompatibola”. La quarta publicazion de la colana per cater lengac (ladin, talian, ingleis e todesch) la é stata scrita da Sabrina Riz e la é stata lurèda fora da Giuditta Soraperra per la pèrt grafica.
Che vegnel metù dant te chest codejel?
“N codejel per rencurèr n ort a na vida ecocompatibola” l é stat scrit da na prinzipianta per i prinzipianc. L é l resultat de na enrescida su libres, blog, sic e c.i. e apontin per chest l pea via con informazions de basa e aspec da conscidrèr se se vel scomenzèr da zero a se fèr n ort. Per ejempie conscidrèr l post olache se vel l fèr, l cerner a soladif e olache l é èga, co semenèr o strapianèr coche carenea, ence aldò de la luna. Dapodò se pel troèr curiositèdes de utol ence per chi che se n capesc jà de orc, desche vèlch rezeta per concimes da se fèr enstesc a cèsa deldut naturèi e zenza elemenc chimics, con croses de ef, schiufes de banana e con orties. L é ence vèlch consei per se parèr dai insec e parassic zenza tessesc; vegn metù dant la tatiches per smaorèr la biodesvalivanza: da la consociazions, a la doura de saores e piantes da medejina e adertura vèlch rezeta per bosemes contra i insec con ingredienc che se à a cèsa e soraldut naturèi e ecocompatiboi! Tinultima podarède entener che che l é l paté e l regrowing e cognoscer ence vèlch son ladin.
La prejentazion de chest lurier la é stata en jebia ai 13 de jugn del 2024 te Ciasa de la Moniaria. Endèna la scontrèda i esperc del setor Sara Desilvestro, Matteo Gross e Sebastian Ghetta, i à portà dant sie intervent, per contèr de sia esperienzes e sia vides de coltivèr.
Enveze en mèrtesc ai 18 de jugn del 2024, semper aló da la Ciasa de la Moniaria, l é stat endrezà “L ORT TE VAJOL!”, n laboratorie per jent grana per entener co endrezèr n ort sun barcon e no demò. Matteo Gross l à portà dant vèlch consei e curiosità sul argoment.
“N codejel per rencurèr n ort a na vida ecocompatibola”, dessema co la autra edizions de “ENTENER E SE FÈR ENTENER”, l é a la leta debant e se pel l troèr aló dai Servijes linguistics e culturèi del Comun General de Fascia, te Ciasa de la Moniaria.
Per informazions, telefon 0462764500 opz. 4 o direzion mail cultura@cgf.tn.it.
