Rua adalèrch “L bosch e i cinch sensc,” l secondo titol de “Entener e se fèr entener”, na regoeta de codejie endrezèda dal Comun General de Fascia per cater lengac.
Chest codejel, scrit da Annarita Lollo co la grafica de Giuditta Soraperra, l porta dant coche na raida tel bosch pel doventèr na esperienza sensorièla. Na ocajion per se slontanèr da la vita de duc i dis e se conzeder mingol de temp per se. Chest picol codejel pel didèr a jir tel bosch a na vida desvaliva, tras i cinch sensc.
N codejel per cognoscer na neva vida de lejer l bosch, vèlch curiosità e perché pa no, ence de neva paroles.
Apede al event de prejentazion del codejel “L bosch e i cinch sensc” stata ai 12 de mé del 2023 aló dal liceo artistich G. Soraperra, l é stat endrezà ence doi laboratories sul teritorie.
Un laboratorie per bec anter i 5 e i 11 egn l à portà dant l argoment del becherle e coche l é do che muda l bosch. Na atività olache èrt e natura se à conjobià e con chela che i bec à abù l met de confrontèr sia imaginazion co la realtà. Desche picoi scienziac, compagné da Pierangelo Giacomuzzi de la sociazion Artcipelago, i bec é jic te anter i èlbres per cognoscer i secrec più sconec del bosch.
I gregn enveze i é stac compagné da Katiuscia Rasom, esperta de bagn tel bosch, te n viac tras i cinch sensc. Na esperienza tel chiet de la natura, che à didà i partezipanc a aprijièr i dons che ne sporc l bosch e se joèr de si benefizies crean l leam fon col ambient.
