Da la colaborazion anter i Servijes linguistics e culturèi del Comun General de Fascia, la Musega Auta Fascia e la Sociazion Antermoia l é nasciù l audioliber multimedial “L Picol Prinz. N viac tras paroles e musega”.
L projet l é nasciù del 2021 canche l é stat portà dant l spetacol dal medemo titol te chel che se conjobièa musega e letradura. Tel spetacol i personajes de la contia é stac spilené da bec fascegn e la Musega Auta Fascia l’à sonà i toc de compagnament.
L liber, col test per ladin e per talian, l é n adatament de la contia de Antoine de Saint-Exupéry, coi dessegnes originèi del autor conzedui aposta per chesta edizion da la “Fondation Jean-Marc Probst pour Le Petit Prince”.
L test l é compagnà dai codesc QR co la letures di atores de la Sociazion Antermoia e la notes de la Musega Auta Fascia.
L audioliber à sport ence l’ocajion per portèr dant laboratories creatives per bec de la scola populères, che é stac metui a jir tel chèder de l’Aisciuda Ladina 2024 co la partezipazion de la Coprativa sozièla Inout e la colaborazion de la biblioteches de Fascia.
La publicazione é la la leta debant aló dal ofize di Servijes Linguistics e Culturèi te Ciasa de la Moniaria a Sèn Jan.