INTERVENC DE POLITICA LINGUISTICA E CULTURÈLA
L Pian organich di intervenc de politica linguistica e culturèla (art. 26, c. 3 de la Lege provinzièla dai 19 de jugn del 2008 “Normes de stravardament e promozion de la mendranzes linguistiches locales”) l porta dant la programazion de la azions de politica linguistica che l Comun General de Fascia se met dant de meter a jir per tegnir su e slarièr fora la doura del lengaz ladin e l’identità culturèla e linguistica de Fascia.
L obietif prinzipal del Pian organich l é l’articolazion de n sistem de mesures che abie desche ejit l smaorament progressif de la doura del lengaz ladin anter la jent enciasèda tel tegnir de referiment.
Per responer a sie doveres l Pian organich cogn se meter dant dantdaldut trei obietives:
- didèr a meter endò en doura la tramiscion intergenerazionèla del lengaz, col viventèr n sentiment de partegnuda inclusif;
- miorèr la calità de la competenza tel lengaz (ence tel scrit);
- smaorèr la doura sozièla del lengaz.
Chest obietif vegn portà dant te n chèder de dialogh, confront e colaborazion co l’autra valèdes ladines del Sela e co l’autra mendranzes linguistiches provinzièles, nazionèles e europeènes, a na vida da se baratèr projec e scomenzadives e de meter a jir politiches de pianificazion linguistica percacentes e adatèdes ai tempes de aldidanché.
