Te la colana Entener e se fèr entener l é stat publicà l “Codejel de bona creanza per respetèr l ambient”, scrit da Angela Pederiva co la grafica de Giuditta Soraperra, n picol manual che rejona de sparagnèr èga e energies, e de smendrèr la produzion de scoadies. Tel codejel se pel troèr idees, consees, curiositèdes e dotrei regoles per redujer l dan che vigniun ge fèsc al ambient te la vita da duc i dis.
Ence chest terz codejel, endrezà dai Servijes linguistics e culturèi del Comun General de Fascia, l é scrit te 4 lengac (ladin, talian, ingleis e todesch), e l vegn do da “Codejel de bona creanza per jir sa mont” e “L bosch e i cinch sensc”, publicazions che troède a la leta debant.
Per prejentèr chest lurier l é stat endrezà na lingia de scomenzadives che se ouc a duta la comunaza: dai bec, ai joegn a la jent grana.
En sabeda ai 7 de otober del 2023 da les 10 da doman, te Sala Grana de Comun General de Fascia, “Sgolèr co la fantasia… per no petèr demez nia!”, n laboratorie per bec anter i 6 e i 11 egn co la sociazion Ecosisters da Fiem.
En vender ai 13 de otober del 2023 da mesa les 6 domesdì, te sala mostres del liceo artistich G. Soraperra, prejentazion del codejel con Stefen Dell’Antonio Monech e i studenc del liceo artistich.
Semper en vender ai 13 de otober del 2023, ma da mesa les 9 da sera, te sala S. Chiocchetti “Maza” de la scoles de Moena, “Moda più sostegnibola” sera de sensibilisazion con Il Markettino e Dorà second hand.
En jebia ai 16 de november da la 2 domesdì te liceo artisctihc G. Soraperra “No l trèr demez… empèra a concèr!” picol laboratorie con idees e consees per concèr guanc o ge dèr na neva parbuda, durèr a na vida creativa pezes e becoi per se fèr zeche da nef e originèl co la sartora Emanuela Palle.
JECH: CHÈRTA DIDATICHES
N jech per didèr i bec a se arvejinèr al argoment de la regoeta desferenzièda e a co la fèr a na vida dreta. Apede a chest i bec, dessema coi genitores, i pel fèr n lurier manuèl con forfesc e cola, e do emparèr ence vèlch parola neva.
