La rassegna de teater che vegn metù a jir dal Comun general de Fascia ogne doi egn, l é l bel resultat arjont de gra a l’Aisciuda ladina 2017, apontin dedichèda a la bela èrt del teater che vegn portà inant con gaissa e gust da pèrt di gropes de teater de duta Fascia. Enlouta, a una con duc i gropes, l era stat dezidù de endrezèr n event ogne doi egn desche apuntament per duta la compagnies de taeter de Fascia che per l’ocajion pel se scontrèr, se moscèr e se baratèr esperienzes, ma ence desche moment de festa che la Aministrazion de Fascia vel ge resservèr a chisc gropes de chi che fèsc pèrt demò volontères, che do vea e te sie temp ledech, se cruzia de se troèr fora n toch de teater, o de se l pissèr, de l traslatèr e do de l emparèr adiment per poder jir a proa e endrezèr n moment de spetacol che ge porte spas, svampol a duta sia comunanza.
De november del 2018 donca l é pontà via la pruma edizion de la Rassegna de Teater endrezèda dal Comun general de Fascia per tegnir su l’attività de teater che vegn portà inant dai gropes de teater de Fascia ma ence bensegur per tegnir su l lengaz e la cultura ladina.
L prum grop che se à moscià sun paladina endèna chesta Rassegna l é stat I Amisc del Teater da Moena ai 16 e 18 de november, co la comedia “Da na bujia a l’autra”, test scrit dal grop medemo, dapò ai 30 de november e ai 2 de dezember l é stat l’outa del grop de la Mizacoles da Ciampedel che à portà dant “Se fae inant l più ascort” de Govi-Canepa, ai 7 e ai 9 de dezember sun paladina l é ruà i Bontemponi da Poza co la comedia “La ciampènes de la Sabeda Sènta” de Guido Chiesa e à serà su la rassegna ai 14 e ai 16 de dezember la sociazion Antermoia con “Vijita de condolianzes” n spetacol vegnù fora da n laboratorie per gregn e tout fora da n test de Achille Campanile.
La Rassegnade Teater 2018 l é stat n gran suzes e per presciapech n meis Fascia à podù se vaghèr de bela seres de legreza e de compagnia.
