L Ofize di Servijes Linguistics e Culturèi del Comun General de Fascia à portà dant l quinto codejel de la colana Enetener e sefèr entener: “Jir a proveder, cojinèr e magnèr a na vida ecosostegnibola e sèna” scrit da Doris Valentini.
Ence te chesta ocajion la profescionista Giuditta Soraperra à rencurà la pèrt grafica del codejel, scrit te cater lengac (ladin, talian, todesch, ingleis).
Te chest nef codejel, se pel troèr vèlch curiosità e consei da meter en doura canche se va a proveder, per se arvejinèr a na alimentazion più ecosotegnibola e sèna, ma ence per emparèr a meter via la magnadiva te cèsa coche carenea e no risièr de la petèr demez o, amancol, de n petèr demez manco che l é meso!
L codejel l é stat portà dant en lunesc ai 9 de dezember del 2024 da mesa les nef da sera te “Ciasa de la Moniaria” a Sèn Jan, dessema col grop de compra solidala IL GERMOGLIO che se à portà dant e ge à dat luster a sia esperienza e atività te Fascia e Fiem.
Te chesta ocajion l é stat dat fora debant la neva publicazion e ence i etres cater codejie: “Codejel de bona creanza per jir sa mont”, “L bosch e i cinch sensc”, “Codejel de bona creanza per respetèr l ambient” e “N Codejel per rencurèr n ort a na vida ecocompatibola”.
Tel chèder de la prejentazion del nef codejel l é stat endrezà ence doi corsc de cojina col chech Andrea Zanoner aló dal Hotel l’Ideale a Moena. Con el se à cojinà rezetes per emparèr co durèr su dut l prodot e co fenir su i vanzumes. I doi gropes se à binà en mercol ai 11 e en lunesc ai 16 de dezember da mesa les sie da sera a mesa les ot da sera opuramenter da les ot da sera a les diesc da sera.
